ឯកឧត្តម ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម ចូលរួមព្រឹត្តិការណ៍ “សប្ដាហ៍ស្ដីពីពាណិជ្ជកម្មតាមអេឡិកត្រូនិច (E-COMMERCE WEEK) ” នៅទីក្រុងហ្សឺណែវ ប្រទេសស្វីស

          នៅព្រឹកថ្ងៃចន្ទ ០២កើត ខែពិសាខ ឆ្នាំច សំរឹទ្ធិស័ក ព.ស. ២៥៦១ ត្រូវនឹងថ្ងៃទី១៦ ខែមេសា ឆ្នាំ២០១៨ ឯកឧត្តម ប៉ាន សូរស័ក្ដិ បានដឹកនាំគណៈប្រតិភូក្រសួងពាណិជ្ជកម្ម ចូលរួមក្នុងព្រឹត្តិការណ៍  “សប្ដាហ៍ស្ដីពីពាណិជ្ជកម្មតាមអេឡិកត្រូនិច (E-Commerce Week) ” ដែលរៀបចំដោយសន្និសីទសហប្រជាជាតិស្ដីពីពាណិជ្ជកម្ម និងអភិវឌ្ឍន៍ (UNCTAD)។

          ជាកិច្ចចាប់ផ្ដើមនៅក្នុងថ្ងៃទីមួយនៃព្រឹត្តិការណ៍នេះ ឯកឧត្តមរដ្ឋមន្ត្រី បានចូលរួមជាវាគ្មិននៅក្នុងកិច្ចពិភាក្សាស្ដីពី ការប្រែក្លាយពីការវិភាគលើការត្រៀមខ្លួន ស្ដីពីពាណិជ្ជកម្មតាមអេឡិចត្រូនិចមកជាសកម្មភាព (e-Trade Readiness Assessments in LDC: from Recommendations to Actions) ដែលរៀបចំដោយ UNCTAD។ នៅក្នុងបទអន្តរាគមន៍របស់ ឯកឧត្តមរដ្ឋមន្ត្រី បានឲ្យដឹងថា នៅឆ្នាំ២០១៦ កម្ពុជាត្រូវបានជ្រើសរើសជាប្រទេសមួយ​ សម្រាប់ធ្វើការវិភាគការត្រៀមខ្លួន ស្ដីពីពាណិជ្ជកម្មអេឡិចត្រូនិច ក្រោមការឧបត្ថមរបស់ UNCTAD។ ឯកសារវិភាគនេះ​ មានសារៈសំខាន់ ដោយបានចង្អុលបង្ហាញភាពខ្វះខាត និងបង្កើតជាផែនទីបង្ហាញផ្លូវមួយ ដើម្បីជំរុញការអភិវឌ្ឍពាណិជ្ជកម្មតាមអេឡិចត្រូនិចនៅកម្ពុជា។

          ឯកឧត្តមរដ្ឋមន្ត្រី បានបន្តទៀតថា ដូចជាការធ្វើពាណិជ្ជកម្មទូទៅផងដែរ ពាណិជ្ជកម្មតាមអេឡិចត្រូនិចក៏មានលក្ខណៈជាបញ្ហាអន្តរវិស័យ ដោយទាមទារឲ្យមានការសម្របសម្រួលជាមួយគ្រប់ស្ថាប័នដែលពាក់ព័ន្ធក្នុងជួររាជរដ្ឋាភិបាល វិស័យឯកជន និងដៃគូអភិវឌ្ឍន៍ ដើម្បីតម្រង់ទិសការអភិវឌ្ឍឲ្យដើរតាមគន្លងតែមួយ ឈានទៅរកការសម្រេចបាននូវគោលដៅរួម។ ឯកឧត្តមបន្តសង្កត់ធ្ងន់ថា ឯកសារវិភាគបានត្រួសត្រាយផ្លូវរួចហើយ អ្វីដែលជាជំហានបន្ទាប់​ គឺត្រូវរៀបចំយុទ្ធសាស្ត្រ និងផែនការអនុវត្តន៍ ដើម្បីជំរុញឲ្យមានការអភិវឌ្ឍលើវិស័យពាណិជ្ជកម្មតាមអេឡិចត្រូនិច។ នៅក្នុងន័យនេះ ឯកឧត្តមរដ្ឋមន្ត្រី បានលើកឡើងចំណុចធំៗចំនួន ៣ ដូចខាងក្រោម៖

          ១) ពង្រឹងការសម្របសម្រួលជាមួយក្រសួង/ស្ថាប័នដទៃទៀត ដើម្បីរៀបចំយុទ្ធសាស្ត្រអភិវឌ្ឍពាណិជ្ជកម្មតាមអេឡិចត្រូនិចមួយដែលស៊ីជំរៅ និងបរិយាប័ន្ន ដែលចង្អុលបង្ហាញលំអិតពីផ្នែកអាទិភាពដូចជាហេដ្ឋារចនាសម្ព័ន្ធ សេវាដឹកជញ្ជូន កសាងការជឿជាក់ ការការពារអ្នកប្រើប្រាស់។ល។ ព្រមទាំងបង្កើតឲ្យមានយន្តការដ៏មានប្រសិទ្ធភាពមួយសម្រាប់ដឹកនាំតម្រង់ទិស តាមដានការអនុវត្ត និងកៀងគរជំនួយផងដែរ។ លើការងារនេះ ឯកឧត្តមរដ្ឋមន្ត្រីបានអំពាវនាវរកការគាំទ្រពីសហគមន៍អ្នកផ្ដល់ជំនួយ ដើម្បីរៀបចំយុទ្ធសាស្ត្រខាងលើ។

          ២) រដ្ឋាភិបាលគាំទ្រដល់វិស័យឯកជន ឲ្យដើរតួនាំមុខក្នុងការជួយដល់អ្នកដែលមានគំនិតច្នៃប្រឌិតខ្ពស់ ក្នុងការធ្វើពាណិជ្ជកម្មតាមអេឡិចត្រូនិច (startup support for e-Commerce innovators)។

          ៣) ដៃគូអភិវឌ្ឍន៍បន្តគាំទ្រកម្ពុជា ដើម្បីស្វែងយល់បន្ថែមឲ្យបានជាក់លាក់អំពីផលប៉ះពាល់នៃបដិវត្តន៍ឌីជីថល ដើម្បីបន្តជួយដល់ការអភិវឌ្ឍន៍នៃវិស័យឯកជន និងរៀបចំកម្មវិធីអភិវឌ្ឍន៍ដោយចេរភាពដើម្បីគាំទ្រវិស័យនេះទាំងមូល។

          ក្រោយពីបញ្ចប់វគ្គខាងលើ ឯកឧត្តមរដ្ឋមន្ត្រី ក៏បានចូលរួមជាវាគ្មិននៅក្នុងវគ្គពិភាក្សាមួយទៀតស្ដីពី “ពាណិជ្ជកម្មឌីជីថល និងការអភិវឌ្ឍ (Digital Trade as if Development Mattered) ” ក្រោមការរៀបចំដោយធនាគារពិភពលោក និងរដ្ឋាភិបាលជប៉ុន។ ឆ្លើយតបទៅនឹងសំនួរអំពីការសម្រេចចិត្តរបស់កម្ពុជា​ ក្នុងការចូលរួមនៅក្នុងសេចក្ដីថ្លែងការណ៍រួមស្ដីពីពាណិជ្ជកម្មតាមអេឡិចត្រូនិច ដែលបានប្រកាសនៅក្នុងសន្និសីទថ្នាក់រដ្ឋមន្ត្រីលើកទី១១ របស់អង្គការពាណិជ្ជកម្មពិភពលោក នៅប្រទេសអាហ្សង់ទីន កាលពីចុងឆ្នាំ២០១៧ ឯកឧត្តមរដ្ឋមន្ត្រី​បានឲ្យដឹងថា​ ការសម្រេចចិត្តបែបនេះ គឺដោយសារតែកម្ពុជាមិនចង់ក្លាយជាប្រទេសមួយ​ ចាំតែអនុវត្តន៍​ច្បាប់ (rule taker) នោះទេ តែកម្ពុជាចង់ចូលរួមយោបល់ឲ្យបានពេញលេញជាអ្នកបង្កើតច្បាប់ (rule creator) ដើម្បីទាញយកផលប្រយោជន៍ និងបំពេញបន្ថែមតម្រូវការជាក់ស្ដែងរបស់កម្ពុជា។

          នៅក្នុងសន្និសីទកំពូលនោះដែរ រដ្ឋាភិបាលជប៉ុន​ បានប្រកាសដាក់ថវិកាប្រមាណ៣០០ លានដុល្លារអាមេរិក ដើម្បីគាំទ្រគំនិតផ្ដួចផ្ដើមស្ដីពីពាណិជ្ជកម្មតាមអេឡិចត្រូនិចនេះ ហើយកម្ពុជាត្រូវប្រឹងប្រែងទាញយកថវិកានោះ ដើម្បីកសាងហេដ្ឋារចនាសម្ព័ន្ធ និងបង្កើតបរិយាកាសជំរុញ (enabling environment) និងអនុវត្តន៍​ការងារអាទិភាពដទៃទៀត សម្រាប់អភិវឌ្ឍន៍ពាណិជ្ជកម្មតាមអេឡិចត្រូនិច។

          កិច្ចប្រជុំចុងក្រោយនៅក្នុងថ្ងៃទីមួយ នៃព្រឹត្តិការណ៍នេះ ឯកឧត្តមរដ្ឋមន្ត្រី បានជួបពិភាក្សាការងារទ្វេភាគីជាមួយ លោក មូគីសា គីទូយី (Mukhisa Kituyi) អគ្គលេខាធិការនៃសន្និសីទសហប្រជាជាតិស្ដីពីពាណិជ្ជកម្ម និងអភិវឌ្ឍន៍ (UNCTAD)។ នៅក្នុងការជួបប្រជុំនេះ ឯកឧត្តមរដ្ឋមន្ត្រី បានស្នើសុំឲ្យ UNCTAD ជួយលើការងារអាទិភាពមួយចំនួន ដោយយោងលើឯកទេសរបស់ UNCTAD ក្នុងការងារនេះ។ ការងារទាំងនោះរួមមាន៖

          ១) គាំទ្រដល់ការបង្កើតយុទ្ធសាស្ត្រពាណិជ្ជកម្មតាមអេឡិចត្រូនិច ដែលជាជំហានបន្ទាប់សម្រាប់ជំរុញការអភិវឌ្ឍក្នុងវិស័យនេះ។

          ២) គាំទ្រដល់ការធ្វើសេចក្ដីព្រាងច្បាប់ស្ដីពីពាណិជ្ជកម្មតាមអេឡិចត្រូនិច ច្បាប់ប្រកួតប្រជែង ច្បាប់ការពារអ្នកប្រើប្រាស់។

          ៣) ជួយក្នុងការអនុវត្តកិច្ចព្រមព្រៀងសម្រួលពាណិជ្ជកម្ម-ប្រភេទ C (Trade Facilitation Agreement – Category C) និងការបណ្ដុះបណ្ដាលសមត្ថភាពបន្ថែម។

          ៤) ស្នើ UNCTAD ឲ្យជួយធាតុចូលស្ដីពី ពាណិជ្ជកម្ម សេដ្ឋកិច្ចឌីជីថល និងពាណិជ្ជកម្មតាមអេឡិចត្រូនិច នៅក្នុងការធ្វើបច្ចុប្បន្នភាពឯកសារវិភាគសមាហរណកម្មពាណិជ្ចកម្មកម្ពុជា ២០១៩-២០២៣។

          ជាកិច្ចឆ្លើយតប លោក គីទូយី នឹងសន្យាបញ្ជូនជំនាញការដើម្បីពិភាក្សាការងារលំអិតជាមួយក្រសួងពាណិជ្ជកម្ម នៅពេលក្រោយ។

          សូមបញ្ជាក់ជូនថា “សប្ដាហ៍ស្ដីពីពាណិជ្ជកម្មតាមអេឡិកត្រូនិច (E-Commerce Week) ” គឺប្រព្រឹត្តទៅពីថ្ងៃទី១៦ ដល់ថ្ងៃទី២០ ខែមេសា ឆ្នាំ២០១៨ ដោយមានការចូលរួមពីរដ្ឋមន្ត្រី និងមន្ត្រីជាន់ខ្ពស់នៃប្រទេសជាសមាជិក ធុរជនជាន់ខ្ពស់មកពីវិស័យឯកជន អង្គការអន្តរជាតិ ធនាគារអភិវឌ្ឍន៍ និងសង្គមស៊ីវិលផងដែរ។

ប្រភព៖ MOC