លទ្ធផលនៃកិច្ចប្រជុំកំពូលមហាអនុតំបន់មេគង្គ លើកទី៦ និងកិច្ចប្រជុំកំពូលកម្ពុជា-ឡាវ-វៀតណាម ស្ដីពីការអភិវឌ្ឍតំបន់ត្រីកោណ (CLV-DTA) លើកទី១០

          កាលពីថ្ងៃទី៣០-៣១ ខែមីនា ឆ្នាំ២០១៨ ឯកឧត្តម ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម បានអញ្ជើញអមគណៈប្រតិភូជាន់ខ្ពស់ ដឹកនាំដោយសម្ដេចតេជោនាយករដ្ឋមន្ត្រី ចូលរួមកិច្ចប្រជុំកំពូលមហាអនុតំបន់មេគង្គ លើកទី៦ (6th GMS Summit) និងកិច្ចប្រជុំកំពូលកម្ពុជា-ឡាវ-វៀតណាមលើកទី១០ ស្ដីពីការអភិវឌ្ឍតំបន់ត្រីកោណ (10th CLV DTA Summit) នៅសាលសន្និសីទជាតិនៃទីក្រុងហាណូយ ប្រទេសវៀតណាម​ ដែលមានការចូលរួមពីប្រមុខដឹកនាំប្រទេសវៀតណាម ឡាវ​ និងបណ្តាប្រទេសទន្លេមេគង្គ ព្រមទាំងប្រធានធនាគារពិភពលោក,​ ធនាគារអភិវឌ្ឍន៍អាស៊ី ​និងអគ្គលេខាធិការអាស៊ាន។

          ក្នុងកិច្ចប្រជុំកំពូលមហាអនុតំបន់មេគង្គ លើកទី៦ ប្រទេសជាសមាជិកបានប្ដេជ្ញាបន្ដគាំទ្រចំពោះគោលការណ៍ ដែលជាមូលដ្ឋាន​នៃក្របខណ្ឌមហាអនុតំបន់មេគង្គ និងលើកទឹកចិត្តភាគីពាក់ព័ន្ធទាំងអស់ចាប់ផ្ដើមពិចារណាមាគ៌ាឆ្ពោះទៅមុខ ដើម្បីកាត់បន្ថយគម្លាតក្នុងរយៈពេល ២៥ឆ្នាំកន្លងមកនេះ និងដើម្បីសម្រេចបានពេញលេញនូវអនុតំបន់មួយ​ដែលមាននិរន្តរភាព សមាហរណកម្ម និងវិបុលភាព។

          ថ្លែងនៅក្នុងកិច្ចប្រជុំដ៏មានសារៈសំខាន់នេះ សម្ដេចតេជោ ហ៊ុន សែន នាយករដ្ឋមន្ដ្រី បានលើកឡើងពីការងារអាទិភាពសំខាន់ៗ ដើម្បីអនុវត្តឲ្យបានពេញលេញនូវ “ក្របខណ្ឌយុទ្ធសាស្ដ្រមហាអនុតំបន់មេគង្គ និងទិសដៅឆ្ពោះទៅមុខ” មានដូចជា៖

          ទី១-គួរយកចិត្តទុកដាក់បន្ថែមទៀត លើការជំរុញការតភ្ជាប់ឲ្យកាន់តែមានប្រសិទ្ធភាព ជាពិសេសការវិនិយោគ​លើហេដ្ឋារចនាសម្ព័ន្ធដឹកជញ្ជូន និងថាមពល ការជំរុញអនុវត្តកិច្ចព្រមព្រៀងសម្រួលការដឹកជញ្ជូនឆ្លងកាត់ព្រំដែន (CBTA) ការបង្កើតតំបន់សេដ្ឋកិច្ចពិសេសឆ្លងកាត់ព្រំដែន និងការអភិវឌ្ឍទីក្រុងតាមរបៀងសេដ្ឋកិច្ច ដើម្បីរួមចំណែកដល់​ពិពិធកម្មសេដ្ឋកិច្ចតំបន់ឲ្យកាន់តែទូលាយ។

          ទី២-បង្កើនការយកចិត្តទុកដាក់លើការតភ្ជាប់ផែ្នកទន់ ដើម្បីទាញអត្ថប្រយោជន៍ឲ្យបានពេញលេញ ពីការវិនិយោគលើការតភ្ជាប់រូបវន្ត រួមទាំងការតភ្ជាប់ឌីជីថល និងការផ្ទេរបច្ចេកវិទ្យា ព្រមទាំងពីការធានាចលនាដោយសេរី និងប្រកបដោយប្រសិទ្ធភាពនូវលំហូរពលកម្ម ពាណិជ្ជកម្ម និងការវិនិយោគដោយបំពេញគ្នាទៅវិញទៅមកនៅក្នុងខ្សែសង្វាក់ផលិតកម្មតំបន់។

          ទី៣-បន្ដខិតខំធានាកំណើនសេដ្ឋកិច្ចGMS ប្រកបដោយភាពរឹងមាំ ចីរភាព និងបរិយាបន្ន តាមរយៈការធានានូវ​ប្រសិទ្ធភាពជាអតិបរមា​ នៃការអនុវត្តកម្មវិធីអនុតំបន់មេគង្គ។

          ទី៤-លើកទឹកចិត្តដល់ប្រទេសសមាជិក និងដៃគូអភិវឌ្ឍន៍​ បន្ដខិតខំកៀរគរធនធានបន្ថែម ដើម្បីអនុវត្តផែនការឲ្យ​ទទួលបានជោគជ័យក្នុងពេលអនាគត ដោយស្វាគមន៍ចំពោះគំនិតផ្តួចផ្ដើមតំបន់សំខាន់ៗដូចជា “ខ្សែក្រវាត់មួយ-ផ្លូវមួយរបស់ចិន” និង​“ភាពជាដៃគូ​សម្រាប់ហេដ្ឋារចនាសម្ព័ន្ធប្រកបដោយ​គុណភាពរបស់ជប៉ុន” ក៏ដូចជាការចូលរួមរបស់វិស័យឯកជន នៅក្នុងការអភិវឌ្ឍអ​នុតំបន់មេគង្គ។

          ទី៥- គួរមានការគិតគូរអំពីចក្ខុវិស័យវែងឆ្ងាយសម្រាប់កិច្ចសហប្រតិបត្តិការរបស់យើងទៅមុខ ក្រោយពីផែនការហាណូយ ២០២២ ត្រូវបានបញ្ចប់ ដើម្បីចាប់យកឱកាស​ និងត្រៀមដោះស្រាយរាល់ផលវិបាកនានា​ ជាយថាហេតុ។

រីឯកិច្ចប្រជុំកំពូលកម្ពុជា-ឡាវ-វៀតណាម ស្ដីពីការអភិវឌ្ឍតំបន់ត្រីកោណ​ (CLV-DTA)​ លើកទី១០ អង្គប្រជុំបានពិភាក្សាលើ​លទ្ធផលដែលបានអនុវត្ត​ន៍កន្លងមក សំដៅអភិវឌ្ឍន៍វិស័យនានាប្រកបដោយនិរន្តរភាព កាត់បន្ថយភាពក្រីក្រ និងគម្លាតផ្នែកសេដ្ឋកិច្ច​ និងសង្គម​។

          នៅក្នុងនោះដែរ ប្រមុខដឹកនាំទាំងបី បានកោតសរសើរអំពីលទ្ធផល​នៃការរៀបចំវេទិកាយុវជន ការតាំងពិព័រណ៍ពាណិជ្ជកម្ម និងទេសចរណ៍ ព្រមទាំងសន្និសីទស្ដីពីការជំរុញពាណិជ្ជកម្ម​ វិនិយោគ និងទេសចរណ៍​ DTA ដែលសកម្មភាពទាំងនោះ​ បង្ហាញពីវឌ្ឍនភាពនៃសហប្រតិបត្តិការ​គ្រប់ជាន់ថ្នាក់ ពិសេសរវាងប្រជាជន​ និងប្រជាជន ក៏ដូចជាសហគមន៍ធុរកិច្ចក្នុងតំបន់។ លើសពីនេះ​ ប្រមុខដឹកនាំនៃប្រទេសទាំងបី ក៏បានបេ្ដជ្ញាចិត្តក្នុងការកៀរគរជំនួយហិរញ្ញវត្ថុ ដើម្បីអនុវត្តន៍​គម្រោងនានាក្នុងតំបន់ត្រីកោណ។

          សូមជម្រាបថា​ ប្រទេសឡាវ នឹងធ្វើជាម្ចាស់ផ្ទះរៀបចំកិច្ចប្រជុំកំពូលកម្ពុជា-ឡាវ-វៀតណាមលើកទី១១ ស្ដីពីការអភិវឌ្ឍតំបន់ត្រីកោណ នៅឆ្នាំ២០២០​ ​ហើយប្រទេសកម្ពុជា នឹងធ្វើជាម្ចាស់ផ្ទះរៀបចំកិច្ចប្រជុំកំពូលមហាអនុតំបន់មេគង្គ លើកទី៧ នៅឆ្នាំ២០២១។

ប្រភព៖ MOC